دليلك من الاطباق المجربة

[الدكتورة نسيبة]

المرة دى بقى انا جيبالكم حاجة من التراث البورسعيدى :d

بس اكلة حلوة جداااا ومشهورة عندنا اوى مع السمك بس كتير من اهل بورسعيد ممكن ياكلوها فى الفطار والعشا والغدا كمقبلات وطريقتها سهلة اوى وهتعجب اى حد يدوقها لانها مش معروفة اوى فى القاهرة

فلفل وباذنجان

المقادير:
فلفل والكمية على حسب الرغبة
باذنجان والكمية على حسب الرغبة
طماطم مقطعة مكعبات صغيرة تقريبا 4 حبات طماطم لكل كيلو من الفلفل والباذنجان
معلقة ثوم متوسطة لكل كيلو
خل والمقدار على حسب الرغبة ممكن نقول ربع فنجان صغير لكل كيلو

الطريقة

نقطع الباذنجان مكعبات بعد تقشيره ونحمره فى الزيت والفلفل كمان نحمره فى الزيت بعد مانخرج منه البذر
وبعد ما نحمرهم كلهم هنسيبهم على جنب

بعد كده فى طاسة او طنجرة نحط شوية زيت صغنين وبعدين الثوم وبعدين الطماطم ونسيبها شوية لحد ما تتهرس بس مش اوى وبعد كده هنحط الخل وبعدين هنحط الباذنجان والفلفل المتحمرين هنسيبهم شوية على نار هادية بعد ما نقلبهم ودقيقتين ونقفل النار وبالف هنا وشفا

جربوها قولولى ايه رايكم هتعجبكم اوى ان شاء الله وعلى فكرة سهلة كمان للشباب عشان يساعدوا شوية فى المطبخ

[الدكتورة نسيبة]

المرة دى انا جبت كيكة زبادى كنت عملتها قبل كده وعلى الرغم انى مش بحب الزبادى الا انها فى الكيكة مبانتش خاااااااالص وكانت ما شاء الله القطعة الواحدة من الكيكة دى تشبع

انا هقولكم على طريقتها الاصلية وعلى التحابيش اللى انا حطتها مع نفسى وعلى فكرة هى ما شاء الله سهلة خالص ومش بتاخد وقت

ندخل بقى على المقادير والطريقة

المقادير:

3كوب دقيق
3بيض
1كوب سكر
1\2 كوب سمن او زبدة
2كوب زبادى
1معلقة صغيرة بيكنج باودر
فانيليا

التحابيش بقى بتاعتى :

جوز هند مبشور بكمية كبيرة عشان يبان فيها
وزبيب او مكسرات مبشورة او حتى سودانى مبشورعلى حسب الرغبة

الطريقة :

نضرب الزبادى والسمن والسكر والبيض والفانيليا وجوز الهند فى الخلاط لمدة 10 دقايق

نضع الدقيق والبيكنج باودر والزبيب او المكسرات مع بعض فى طبق ونبدأ نضيف الخليط تدريجيا مع التقليب المستمر فى اتجاه واحد

وتصب فى صينية تيفال وتزج فى فرن سبق تحميته ونسيبها فى الفرن لمدة نصف ساعة

وان شاء الله تعجبكم وبالف هنا