الوصفات المستخبية للاكلات اللى هيه

[الدكتورة نسيبة]

[align=center]السلام عليكم ورحمة الله وبركاته

عدت معاكم بموضوع لاصحاب الاكلات الخاصة اللى مش بيحبوا ياكلوا كل حاجة والاطفال اللى بيبقى صعب عليهم انكم تقنعوهم بالخضار او الفاكهة وعاوزين طول الوقت مصاصة ولبان



الموضوع ببساطة اننا هنقدم الاكل بطريقة مختلفة وفى نفس الوقت مستخبية يعنى مش هتبان للاطفال ولا الكبار وخاصة الشباب اللى مش بيحبوا كل الاكل

هنقدم خضروات وحلويات وفواكهه بشكل مختلف وطريقة تقديم مختلفة

يارب تكون الفكرة عجبتكم وان شاء الله تستفيدوا

[/align]

[أمة الله (نانيس)]

وعليكم السلام ورحمة الله وبركاته

عدت معاكم بموضوع لاصحاب الاكلات الخاصة اللى مش بيحبوا ياكلوا كل حاجة

ده موضوع تفصيل يا ميرا

أنا زبونة دائمة إن شاء الله

[عبدالله]

:d :d :d

حلو العنوان اوى


حبيت اسجل اعجابى بالعنوان

والموضوع

وجزاكى الله خير

[الدكتورة نسيبة]

اهلا اهلا يا نانيس

منورانى ويارب اعرف اخبى الاكل اللى مش بتحبيه

اهلا يا عبد الله منورنى يا فندم

واتفضل العنوانا والموضوع وربنا يكرمك على انهم عجبوك

جزاكم الله خيرا

[عبدالله]

اتفضل العنوان


انا عاوز آكل

يعنى عزومة جامدة كده ولا اى مصلحة ده انا اول مرة اعدى على المطبخ بتاعكو :d

[الدكتورة نسيبة]

خلاص يا عبد الله قولى ايه الاكلة اللى مش بتحبها وان شاء الله اخبيها على طريقتى وتاكلها

واستنى عزومة جامدة بقى

منور يا عبد الله وجزاك الله خيرا على المتابعة

[eng.supermuslimah]

[align=center]بسم الله الرحمن الرحيم

فكرة جميلة كالعاده يا دكتورة
وانا كمان عاجبني الاسم : )
يلا مستنين الوصفات [/align]

[الدكتورة نسيبة]

[align=center]يلا نتبدى اول وصفة مستخبية لاكلاتنا

اعرف ناس كتير مش بتحب الكوسة

فالنهاردة ان شاء الله هنخبى الكوسة فى اكلنا عشان تبقى وصفة مستخبية لاكلة كوسة من اللى هيه

اسم الاكلة بتاعتنا قوراب الكوسة

المقادير :

كوسة والكمية على حسب الافراد

لحمة مفرومة

بصلة

كيس بشاميل جاهز

موتزاريلا او جبنة رومى مبشورة

بهارات

الطريقة

- اول حاجة هنقطع الكوسة بعد ما ننجرها (نقشرها يعنى)لقطع طولية ونسيبها تسلق فى مياه وملح

- اثناء ما الكوسة بتسلق فى المياه والملح هنبدا نعصج اللحمة (نقطع البصل مكعبات صغيرة ونحطها فى طاسة على النار مع شوية زيت حاميين لحد ما البصلة يبقى لونها ذهبى وبعد كده هنحط اللحمة المفرومة على البصل ونقلبها لحد ما تستوى وهنحط بهارات على اللحمة وهى ملح وفلفل ومعلقة صغننة خالص قرفة ومعلقتين صلصة طماطم ونسيبها شوية ع النار عشان تستوى مع تقريبا نص كوب مياه)

-هنجيب بعد كده الصينية البايركس او التيفال اللى هنحط فيها الكوسة وهنجيب الكوسة ونفرغها من النص عشان تبقى على شكل قارب ونبدا نحط فيها اللحمة المفرومة اللى احنا عصجناها جوه قوراب الكوسة

- هنجهز بعد كده البشاميل الجاهز ونحطها على الوش بتاع الكوسة فى الصينية ونحط فوقها اموتازريلا او الجبنة الرومى المبشورة ونحطها فى الفرن لحد ما الجبنة تذوب ويبقى لونها ذهبى لمدة خمس دقايق تقريبا او اقل

يارب اكون قدرت اخبى الكوسة واللى مكنش بيحبها يحبها

ولو فيه اى استفسار عن الاكلة انا تحت امركم ولو فيه حد عاوز يخبى اكلة مش بيحبها يقولى وانا ان شاء الله اخبيها

وجزاكم الله خيرا[/align]

[أمة الله (نانيس)]

وصفة راائعة يا ميرا

وإن شاء الله تتنفذ

[الدكتورة نسيبة]

ربنا يكرمك يا نانيس

والحمد لله انهعا عجبتك

الوصفة اللى جاية بقى دى عشانك

يارب هى كمان تعجبك

[الدكتورة نسيبة]

[align=center]الوصفة المستخبية المرة دى عشان [glint]نانيس[/glint]

هى وصفة مستخبية لاكلة مش بتحبها نانيس وهى [glint]الكبدة [/glint]

هحاول اخبى الاكلة ونشوف ايه راى نانيس هتاكل الكبدة بالوصفة دى ولالا

[blink]وصفة مستخبية لاكلة كبدة من اللى هيه[/blink]

المقادير:

كبدة والكمية على حسب الافراد

بصل وفلفل اخضر وطماطم

1 رغيف فينو فرنساوى او على حسب كمية الكبدة

مايونيز وجبنة موتزاريلا

بهارت (ملح وفلفل اسود)

الطريقة :

- اول حاجة هنقطع الكبدة صغيرة خالص ونقطع البصل والفلفل الاخضر والطماطم مكعبات صغيرة

هنحط معلقة زيت صغيرة فى الحلة ونحط البصل والفلفل الاخضر ونقلبهم لحد ما يستوا شوية وبعد كده هنضيف الطماطم ونقلبهم مع بعض وبعدين هنحط الكبدة ونضيف البهارات بتاعتنا ونحط مياة لحد ما تغطى سطح الكبدة خالص

-خلال ما الكبدة بتستوى هنجيب العيش الفينو ولازم يكون عيش فرنساوى (العيش الطويل التخين ) وهنقطع العيش الى كذا قطعة وناخد كل قطعة ونفضيها من اللبابة بتاعتها (العيش الابيض اللى جوه يعنى هنحافظ ع الهيكل بس )وناخد بالنا اننا نسيب قاعدة للعيش من تحت عشان تسند الخلطة لما نضيفها للكبدة

-بعد ما جهزنا العيش هندهن صينية بحتة زبدة صغيرة ونجيب فص توم ونمشيه فوق الصينينة من غير ما نهرسة

-بعد ما الكبدة تستوى هنجيبها وميبقاش فيها مياه خالص ونضيف المايونيز عليها او الطحينة زى ما تحبوا ونقلبهم كويس مع بعض وبعدين نحشى بيهم العيش ونرش عليهم من فوق الموتزاريلا وندخلهم الفرن لحد ما الجبنة تسيح بس

يارب تكون الوصفة المستخبية عجبتكم وتعجب نانيس ونشوف قدرت تفرق معاها ولالا

[/align]

[أمة الله (نانيس)]

ماما بتشكرك نفسها

نشكركم حتى تستغيثوا

إن شاء الله أجربها بجد ، تسلم ايدك يا نسيبة

[دينا البحر]

نفسي اعرف بعد ما تتسلق تتفرغ ازاي ؟!!!!!!!!!!!!!!

الكوسة بتستوي علطول ومش بتاخد وقت معنى اني اسلقها قبل ما احط الباشميل يعني بقت عصيدة

[الدكتورة نسيبة]

لا يا دينا هى مش هتخليها تستوى كتير اوى هتسويها بس مش تهريها وبعدين تجيبى معلقة وتفضيها من البذر اللى بيكون جواها لحد بس ما يفضل الجزء الخارجى منها

لو مفهمتيش لسه ممكن ابقى اعملهالك واوريهالك عملى يا قمر

نورتى الموضوع يا دندون

[اسماء الله الحسنى]

السلام عليكم
عضوة جديده بس هتقل عليكم
اهلا يا دكتورة ممكن تخبيلى السبانخ لأنى مش بحبها خالص بس مفيده حسب ما بيقولوا
وفى حاجات تانيه ابقى اقولك عليها بعدين