دلوقتي جينا للموضوع الثاني الرئيسي انهاردة
يعني إيه ال4 needs أو الحاجات الأربعة ؟
دي الأربع الحاجات الأساسية اللي بيحتاجها الإنسان وعلشان الإنسان يكون متوازن لازم يلبي الأربع حاجات ولا تطغى حاجة عن الأخرى ...
الحاجات الأربعة هم
: -1 الحاجة الروحانية : وفي ناس بتلبي الحاجة دي بسماع موسيقى أو قعدة علي النيل أو كرسي وشمسية على البحر أو تأمل في لوحة ...... وهكذا , لكن طبعا إحنا عندنا أكثر ما يمكن أن أن يلبي الحاجة الروحانية وهو العبادات والتقرب إلى الله زي " قرأة القرآن – التفكر في خلق الله – عمل طاعات لله بمختلف أشكالها "....وهكذا.
-2 الحاجة المادية : و دي أي حاجة مادية " فلوس – أكل - الحاجة نوم - رياضة ".
-3 الحاجة الإجتماعية :
ودي حاجة الإنسان لإقامة علاقات إجتماعية مع من حوله " تكوين صداقات – علاقاته بأسرته " .... وهكذا.
4- الحاجة العقلية :
و ده بيكون بقراءة كتاب – مجلس علم – أو أي حاجة ممكن تتعلم منها شيء جديد .
طيب تمام ... إيه علاقة ده بالإستعداد لرمضان ؟
اقولكم
إزاي نستعد لرمضان بحيث إننا نلبي جميع الإحتياجات؟
خلينا الأول نتفق إننا بنبقى مركزين في رمضان أكثر على الروحانيات
أكيد ... ده شهر رمضان ... بيجي مرة واحدة في السنة ... وكل واحد عايز يلم فيه حسنات على قد ما يقدر.
طيب إذا كان ربنا خلقنا جسم و روح و عقل و خالقلنا ناس حوالينا نتواصل معاهم ... ماينفعش نشتغل على جانب واحد.
إزاي يعني ؟
ليه مانتعلمش حاجة جديدة "نلبي الحاجة العقلية" و في نفس الوقت ناخد نية لوجه الله وناخد بيها ثواب.
أو مثلا نتواصل مع الناس اللي حوالينا "الحاجة الإجتماعية" وبرضه ناخد ثواب بالنية.
أو ناخد بالنا من صحتنا وأهو برضه المؤمن القوي خير وأحب إلى الله من المؤمن الضعيف.
وهكذا ...
وإحنا عندنا وقت يا مي نعمل كل ده في رمضان ؟؟؟؟
ما هو هنا بقى يجي دور الدمج أو الsynergy وده معناه إنك ممكن تعمل حاجة وتلبي بيها أكتر من حاجة من إحتياجاتك ... يعني بالبلدي كده" 2 بسعر واحدة" أو " واحدة ومعاها واحدة هدية "
إزاااااااااااااااااااااي ؟؟؟؟
سألتوني إزااااي ... أقولكم بقى ...
مثلا لو واحد مننا رفع السماعة النهاردة وكلم كل قرايبه وقالهم " بعد السلامات طبعا" إنهم يحجزوا يوم ( ) رمضان علشان يفطروا عنده وأخد الكام نية دول :
•صلة رحم
•إدخال السرور على قلب مسلم
•إفطار صائم
و غيره من اللي ممكن ييجي على باله....
وطبعا محدش ياخد الخطوة الجريئة دي من غير ما يستأذن ست البيت الأول (مامته .. مراته .. كدة يعني).. علشان العواقب متبقاش وخيمة ..
دي كدة الخطوة الأولى(التخطيط( ..
نيجي بقى للخطوة التانية )الإعداد)
لو صاحبنا ده قدر ياخد يوم العزومة أجازة من شغله أو يرجع بدري من كليته .. علشان بس يساعد في التجهيز للعزومة.. تخيلوا ده ممكن يكون وقعه إزاي على الأم أو الزوجة .. جربوا وحتلاقوا النتيجة مبهرة .. خصوصا لو صاحبنا ده كان ولد مش بنت.. لأنها بتبقى حركة غير متوقعة من الولاد..
الخطوة التالتة )التنفيذ(
جت العيلة .. وفطروا ... وقضوا وقت لطيف .. وياريت كمان لو بعدها صلوا التراويح جماعة ..
الخطوة الرابعة )رفع الأنقاض)
طبعا دي مش محتاجة شرح .. تخيل الست اللي قعدت من قبلها بكام يوم تجهز البيت .. وتطبخ.. وقعدت تضايف العيلة .. تخيلوا الإجهاد اللي هي فيه ..وفي وسط كل ده .. تادااااااااا.. يظهر الفارس(اللي هو صاحبناو صحبتنا برضو علشان ما نزعلش حد) .. في هالة من الضباب .. من قلب الحطام .. ويقف على رأس الأنقاض قائلاً: "شبيكي لبيكي يا ست الكل .. تحبي اساعدك في ايه؟".. .
تخيلوا صاحبنا ولا صحبتنا دي بياخد حسنات قد ايه مع كل طبق بيغسله !!!
بجد بقى ...
لو فكرنا في اليوم ده حنلاقي صاحبنا خد ثواب :
--1 صلة رحم.
2 -افطار صائم.
3- بر والدين (سواء كان عايش مع أهله أو عازمهم في بيته) أو إحسان للزوجة.
4-ادخال سرور على قلب مسلم .
5- الاجتماع وقضاء الوقت في طاعة.
6- صلاة الجماعة.
7- ويمكن يكون في تاني على حسب كل عزومة شكلها ايه..
ده من ناحية الثواب..
طب من ناحية الحاجات الأربعة؟؟؟
الحاجة الاجتماعية واضحة جدا مش محتاجة اشرحها .. (مش كدة ولا ايه؟(
الحاجة المادية : طبعا متخيلين ممكن الناس تكون كلت اصناف شكلها ايه .. وياريت لو كان كمان السفرة عليها بعض الاكل الصحي (سلطة – فاكهة .. الخ) .. والتمر زي سنة النبي صلى الله عليه وسلم..
الحاجة العقلية : لو صاحبنا ده ولد ... تبقى دي انسب فرصة يتعلم فيها علم مش حيتعلمه في المدارس .. شغل البيت !!!! شكلي هضرب انهاردة
ولو بنت يبقى اكيد اتعلمت اصناف مكنتش بتعرف تعملها قبل كدة ..
على فكرة .. ده بجد مش هزار.. لكن برضه في وجود التجمع العائلي ده .. أكيد سهل ان صاحبنا يفتح أي موضوع .. يفيد غيره بمعلومة يعرفها.. ويتعلم منهم حاجة جديدة ..
وأكيد بعد يوم زي ده صاحبنا وصحبتنا حيطلع منه بروحانيات عالية جدا .. ويبقى كدة اشبع الحاجة الروحانية..
ده مثال مجمع الحاجات الأربعة
لكن ممكن نعمل حاجات تانية نشبع فيها حاجة واحدة أو اتنين فقط..
مثلا:
•لو ابتدينا من دلوقتي.. نقرا ورد القرآن بتاعنا بتفسيره.. ده حيخلينا نتعلم حاجات جديدة.. وفي نفس الوقت مع دخول رمضان .. حيفرق معانا في قراءة القرءان بتدبر..
•أو لو ابتدينا من دلوقتي نخفف اكلنا... اكيد أول يومين صيام في رمضان مش حيبقوا صعبين زي السنين اللي فاتت..
•أو لو ابتدينا من دلوقتي نمشي كل يوم نص ساعة .. أكيد رجلينا حتقدر تشيلنا الـ 8 ركعات بتوع التراويح كلهم من غير تعب..
دي الأمثلة بتاعتي.. هو انا هقول كل حاجة ولا ايه؟ ...
فكروا انتوا بقى وكل واحد يظبط أمثلة تتماشى مع حياته.. وياريت يشاركنا فيها علشان نستفيد كلنا والثواب يعم.. عاوزة اشوف شطارتكم.. وافكاركم معايا
وعاوزين نشوف صيامنا السنة دي حيفرق؟ ... ولازي كل سنة؟
معلش طولت عليكم بس يارب تكون الفكره وصلت
لان رمضان السنادي لازم إن شاء الله يكون غير علينا كلنا وعلى الامة الاسلاميه يارب
وكل سنه وانتم طيبين يارب
تحياتي لكم
رد مع اقتباس
مواقع النشر (المفضلة)